Tuivawl lui tui thlit fîm theih loh khawpa a nut avangin mipuiin harsatna an tâwk

Saitual khawpuiah thla khat vel tui sem mumal a ni tawh lo a, hei vang hian Saituala MJA member-te chuan June 13, Thawhlehni khan Tuivawl luia Saitual Water Supply Scheme tui lakna an tlawh. National highway laih zauh a nih avangin Tuivawl lui tui chu thlit fîm theih loh khawpa a nut nasat thu leh mipuiin harsatna an tawh thu an tarlang.

Saituala MLA member-te chuan, NH kawngpui zauhnaah leivungte kawng thlangah paih ṭhin a nih avangin Tuivawl tui a nu hle tih tarlangin, "A nut lam hi a tehna Nephelometric Turbidity Unit (NTU) 400 vel a ni mek. Mihring ei leh ina him chin chu NTU 5 a ni a, treatment plant-a an lak luh theih chin chu NTU 10 vel a ni," an ti.

Tui nut lam tehna (NTU) a san lutuk chuan bàwlhlote nena sâwngbàwl pawha tihfìm zawh a nih loh vang te, filter-in a tawrh dawn avang leh harsatna nasa zawk a thlen theih dawn avangin tui chu tihfim turin an lâk luh loh law law rih thu Saitual Water Supply Scheme enkawltu PHE engineer-te chuan an sawi.

Tui nú nghah fìmna (sedimentation tank)-a tui lut chu fûr tui nu satliahah chuan darkar 3 vel nghahin a tlâk fìm theih laiin, tuna tui nú chu ni nga chhung an dah pawhin a tla fím thei lo tih MJA member-te an hrilh.

PHE Saitual WATSAN Sub-Division SDO Lalhruaitluanga chuan, kum dangah chuan thlit fìm theih loh khawpa tui a nú a nih pawhin Bahra lui leh tlang ram hmun dang aṭanga lei hìpna hmanga tui lâk hmangin harsa lutuk loin Saitual mipui châwm an ni tih sawiin, "Kumin hian ṭhál a rei avangin Bahra lui leh hmun dang aṭanga lakna ṭhinah tui mamawh tâwk lak tur a awm thei rih lo. Ruahtui a tla ṭha ṭan a, harsatna zualpui sutkian theih kan beisei," a ti.

Lalhruaitluanga chuan, Saitual GWSS chu siam a nih hun laiin (kum 2010)-ah tun anga kawng laih vanga tui nu tur hriat lâwk a nih loh avangin tui nghah fimna chhâwng thui zawk siam a nih loh bakah, tui chawh fìmna clariflocculator telh theih a nih loh thu a sawi.

Kawng laih vanga Tuivawl tui nú chuan a lo berah fûr lai chuan kum nga vel a la tihbuai phâk a rin thu te, tui tihfimna hmanrua poly alluminium chloride chu mihring tana him chin a awm avangin tui nut dan azira pawlh a ni a, duh zat zat pawlh a rem loh thute SDO chuan a sawi bawk.
Saituala MJA-te chuan, thlit fìm theih loh khawpa Tuivawl tui a nut mek avangin thla khat vel chhung chu Saitualah tui sem a mumal tawh loh thu leh, mi tam takin harsatna an tawh thu an tarlang a ni.