North East NSS Festival ṭan a ni

India hmarchhaka National Service Scheme (NSS) volunteer-te intawh­khawmna, North East NSS Festival 2023 chu nimin khan Pachhunga University College seminar hall-ah ṭan a ni a, Sports & Youth Services minister Robert Romawia Royte-in a hmanpui.

Kumina North East NSS Festival hi Mizoramin a thlen vawi ngana a ni a, June 17, 2023 thleng a awh dawn. Festival-ah hian hmarchhak state zingah Manipur tih loh state dang zawng aṭangin NSS volunteer mi 280 vel an tel a ni.

Robert Romawia Royte chuan, NSS Festival chu state hrang hrang hnam ziaráng inzir tawnna leh ṭhian ṭhaa insiam tawnna huna hmang turin NSS volunteer-te a chah a, "Mizoram NSS hmalaknate hi ram pum ang pawhin entawn tlak a ni a, Mizorama pawl intél khawm hrang hrang zinga a mamawhte tana thisen pe tam ber NSS volunteer-te an ni fo hi a ropui hle a ni," a ti.

NSS Festival-ah Manipur aṭanga NSS volunteer-te an lo tel ve thei lo chu pawi a tih thu sawiin Minister chuan, "Hei hian tun dinhmunah hmarchhak state-te inlungrualna leh thawhhona ṭha a pawimawhzia a tilang chiang hle. Hmarchhak state-a cheng hnam hrang hrangte inkarah inhriatthiamna leh inunauna ṭha zawk a awm theih nan theihtawp chhuah a ngai," a ti a, NSS-te chu an theihna zawn apiangah hma la turin a sawm.

Robert Romawia chuan, NSS volunteer-te chu social media hman danah chin tâwk thiam tur leh thil ṭangkai atan hmang thiam turin a chah a, "Social media hman sualna vanga in nunin a chhiatpui lohna turin IT Act leh cyber law-te zir chiang u la, fimkhur ang che u," a ti a; NSS thupui 'Mahni aia mi dangte dah hmasak' tih chu a taka nunpuitu nih tum zel turin a fuih bawk.

Mizoram NSS officer F Sangvuana tarlan danin, kum 1972 khan PUC-ah NSS din a ni a, Mizoram State NSS Cell chu kum 1988-ah din niin, thawktu mi pariat an awm mek. NSS Mizoram hian kum 2022-23 chhung khan blood donation camp vawi 88 huaihawtin, thisen unit 6,000 chuang an pe a; thing phun leh enkawl, vantlang leh khawpui tihfai, awareness campaign an kalpui ṭhin bawk.