Sorkarin a ruahman leh a duante a theih chin chinah privatize a ṭha - Chief Minister

Chief minister Zoramthanga chuan, hmasawnna hna sorkarin a ruahman leh a duante chu a theih chin chinah mimal kuta hlan (privatise) zel ṭha a tih thu a sawi.

CM Zoramthanga hian nimin khan Synod Conference Centre-a Mizoram State Cooperative Marketing & Consumers' Federation Ltd. (MIZOFED) Annual General Assembly vawi 25-na a hmanpuinaah thu sawiin, "Cooperative movement hi ramin chak zawka hma a sawn theih nan a pawimawh. Hmasawnna hna sorkarin a ruahman leh a duante chu a theihna chen chenah privatise zel a ṭha," ti.

Mizoram siamṭhat leh hmasawnna tura hna thawh chu a chhunga chêngte kutah a innghat tih sawiin CM Zorama chuan, "Hripui léng leh thil dang dang vangin harsatna ramin tâwk mah ila, kan tawn aia chhiatna nasa zawk lo tawng tawh ram ropui taka insiam a intungding leh tate hre rengin, hmasawna nasa zawk kan thlen thei," a ti a, ṭhahnemngai taka ram tan thawk turin kal khawmte a chah.

MIZOFED inkhawmpuiah hian Chief Minister-in MIZOFED hnuaia branch ti ṭhate hnena lawmman a sem a; branch ti ṭhate chu POL division-ah Lawngtlai Branch, LPG division-ah Aizawl Branch leh EC division-ah Lungleia MIZOFED Store-te a ni. Cooperative Societies registrar Amol Srivastava pawhin thu a sawi a; chawhnuah rorel a nih bakah, kum 2023-2028 chhunga Board of Directors turte thlan a ni.

MIZOFED hian Mizorama hmun pakuaah petrol pump leh district parukah eirawngbawlna gas-a sumdawnna an din tawh a; Kawnpui, Hrangchalkawn, Champhai leh Phunchawngah petrol pump thar an buatsaih mek. Mipui ni tin mamawh hrang hrang zawrhna an nei bawk.

Thawktu 169 an awm mek a, kum 2021-22 chhungin an sumdawnna hrang hrang aṭangin Rs 17,72,444.15 an hlép a ni.