World Indigenous People Day hmang

Zo Re-unification Organisation (ZORO) General Headquarters chuan August 8, Inrinni zan khan Ignite Studio-ah International Day of World Indigenous People Day an hmang.

World Indigenous People Day hmanna inkhawm hi ZORO general secretary Lalmuanpuia Punte-in a kaihruai a, Mizoram University-a Political Science zirtirtu Prof. J Doungel, MZU IQAC director ni bawkin thupui a sawi. ZORO president R Sangkawia leh ZORO Ṭhalai president L Ramdinliana Renthlei ten thu an sawi bawk.

ZORO President chuan, ZORO chu UNO-a inziak lut a nih thu leh UNO-in a duan angin kum tin Indigenous People Day an hman ṭhin thu a sawi a, "Zo fate hi ram hrang hrangah ṭhehdarhin kan awm a, ramriin daidang mah se, kan inunauna a bo tur a ni lo. Ṭawng a inan loh avangin unau kan nihna a bo lo a, thisena inzawm, thlah khat vek kan ni. Kan awmna hmun ṭheuhah rinawm takin awm ila, kan tan Pathianin kawng a la hawng ang a, kan la insuih khâwm dawn a ni," a ti.

Prof. J Doungel chuan, Zo fate chu India, Bangladesh leh Myanmar ramahte a hlâwmin an awm thu sawiin, "Kan awmna ram azirin kan hming a danglam ve zel. Mizorama awmte chuan Mizo han tih hian kan lungawi mai a, Burma-ah chuan Chin min ti a, Bangladesh lamah chuan Kuki min ti a, kan awmna ram sorkarin min pawm dan apiang hi kan nihna chu a ni," a ti a; khawi rama pawh ni se, Zo fate chu unau vek an nih thu leh chumi-ah chuan chian a ngaih thu a sawi.