Lung chimin mi 1 chhilh hlum

June 13, Thawhlehni zan dar 10 vel khan Khaw­zawl leh Kawlkulh inkar, Khawzawl aṭanga km. 9 vela hla Khuailui bulah kawng chhak aṭangin lung a tla a, kawnga lung leh lei tla thian mek Anusha Project ta excavator a delh a, excavator enkawltu Sujay Chakma (32) s/o Sonolal Chakma, Ragivnagar, Mamit district a hmunah a thi.

Khawzawl police-te leh Quick Respond Team chuan chhiatna thlenna hmun hi an pan nghal a, ruang lak chhuah tumin hma an la a ni.

Thawhlehni zan zanlai pelh hnu, dar 1:45 vel khan Sujay Chakma ruang hi lak chhuah a ni a, nimin zing khan Khawzawl damdawi-ina endik a nih hnuah an khua panpui a ni.