Lawngtlaia lirthei chuàn man sawiho

Lawngtlai additional DC Abraham Beirazi Khithie hoin nimin khan Lawngtlai Press Club-ah sorkar hotute leh pawl aiawhte'n mihring phur lirthei chuàn man (rate) an sawiho a, an rawtnate chu State Transport Authority-ah thlen a ni ang.

Abraham Beirazi Khithie chuan, mihring phur chi lirthei - autorickshaw, taxi leh maxicab-te chuan man chu mi retheite nghawng a nih avangin ngun taka ngaihtuah a ngaih thu a sawi a, "Meeting thutlukna hi hman nghal tur ni loin, Lawngtlai district rawtna anga STA-a thlen tur a ni a, district hrang hrang aṭanga rawtna lut hmangin STA-in thutlukna a la siam dawn a ni," a ti.

Ṭhutkhawmah hian mihring phur lirtheite tana hloh awm lo tur leh mipui tana na lo tura lirthei chuàn man siam ṭha an ti a; kilometre bîa auto-rickshaw, taxi leh maxicab hman man atana rawtna chu STA-a thlen turin an pawm a ni.

Lawngtlai district-a auto-rickshaw leh taxi service mekah permit dil belh a ṭul leh ṭul loh an sawiho bawk a; uluk zawkin district dinhmun zir chian leh phawt ni se, STA-ah zir chianna report thehluh ni se, an ti.