Zirtirtu a khaw mi lakin post-a awm ṭhat loh vanga harsatna a tihziaawm beisei a ni - Education Minister

School Education minister Lalchhandama Ralte chuan, tun hnaia zirtirtu lâk tharah a theih ang angin a khaw mite lak an nih thu sawiin, chu chuan zirtirtu, thingtlanga awm ṭhat duh loh vanga harsatna a tihziaawm theih beisei a nih thu leh LADC-a higher secondary school-ah science zirna dah belh a nih dawn thu a sawi.

June 13, Thawhlehnia Lai Autonomous District Council (LADC) Chief Executive Member conference hall-a LADC hotute nen LADC chhunga zirna kalpui dan tur sawihonaah minister Lalchhandama chuan, "A theih ang angin sorkarin zirna siamṭhat hna a thawk. Tun hnaia sikula thawk tur lâkah a theih ang angin a khaw mite lak a ni a, hei hian thingtlang lamah an post-a awm ṭha duh lo a tihziaawm theih beisei a ni," a ti.

Inkawmhonaah hian Mizoram sorkarin Lawngtlai district-a middle school 18 sorkara a lak (provincialise) tawhte LADC kuta hlan lêt leh dan tur sawiho a ni a; LADC kuta hlan lêt chu hmanhmawh theih a nih loh avangin fimkhur taka kalpui a ṭul thu te, thutlukna siam hmain sikula thawk mekte chu state hnuaia awm nge an duh, LADC hnuaia awm tihte thlantir an nih dawn thute sawi a ni.