Minister-in Forest Rest House a hawng

Environment, Forest & Climate Change (EFCC) minister TJ Lalnuntluanga chuan nimin khan North Hlimen khuaa Forest Rest House thar a hawng. Rest House hi Integrated Development of Wildlife Habitat (IDWH) aṭanga hmuh cheng nuai 30 sénga sak a ni.

TJ Lalnuntluanga chuan, Mizoramin hun khirh leh harsa tak a tawh laiin sorkarin a theih ang angin hmasawnna hna a thawh thu a sawi a, "Ram rawngbawlna a ni emaw, mahni hnathawhna kawng emaw, engkimah neitu thinlung pua thawh a nih chuan hmasawnna a taka hmuh theih a ni ṭhin," a ti.

Hawnna inkhawmah hian Serlui bialtu MLA Lalrinsanga pawhin thu a sawi a; Serlui bial mamawh hrang hrang an thlente chu lo ngaih pawimawhsak zel turin Minister a ngen.

Transport minister ni bawk TJ Lalnuntluanga hian nimin vek khan Tuirial luia NEEPCO leh Pualreng Wildlife Sanctuary inkara tuikawng sial dan tur a en nghal bawk. Minister hi MLA Lalrinsanga Ralte bakah, Transport director R Lalrammawia leh mi pawimawh dangte'n an ṭawiawm a ni.