KHAWTHLIR

Manipur ráltlân

Nimin tlai dar 5 dinhmun angin, Manipur tualchhung buaina avanga sahimna zawnga Mizorama awm mi 11,547 an tling. Manipur ráltlân awm tamna ber Kolasib district-ah mi 4,055 an awm a, Aizawl district-ah mi 3,805 leh Saitual district-ah mi 3,034 an awm bawk.

Thisen pe

CZ Higher Secondary School, Kolasib chuan nimin khan Kolasib District Hospital-ah thisen unit 71 an pe a, petute mipa 45 leh hmeichhia 26 an ni.

Tlawh khap

SIPMIU-in Tanhril Mualkhang rama Water Treatment Plant an siam mekah khawl hmanga hna an thawh avangin Aizawl DC chuan Water Treatment Plant leh Tanhril Mualkhang hmuna IPS Centre-te chu mipui tan tlawh khap a nih thu a puang. Bawrhsap chuan, "Water Treatment Plant lui hnaiha balu la ṭhinte'n he lai hmun hi paltlang loin balu lak tur a ni," tiin, thupek bawhchhiate chu IPC Section 188 hmanga hrem theih an nih thu a tarlang.

Vawk khuahkhirh

Aizawl additional DC Lalrinzuala chuan Aizawl district-ah vawk pùl hri, African Swine Fever lênna hmun aṭanga vawk, vawksa leh vawksa aṭanga thil siam lak luh khap a nih thu a puang a, "AH&Vety Director aṭanga phalna nei tan ASF hri lèn lohna state aṭangin vawksa aṭanga thil siam lak luh phal a ni a, standard operating procedure zawm ngei tur a ni a, APEDA emaw FSSAI-in a pawmpui firm an ni tur a ni," a ti.

Chief Justice kâwm

Law & Judicial minister TJ Lalnuntluanga chuan June 13, Thawhlehni khan Gauhati High Court chief justice Justice Sandeep Mehta chu Ainawn Venga Chief Justice bangla-ah a kâwm a, Mizorama dan rorelna (judiciary) hmasawnna turte a sawipui. Justice Sandeep Mehta chuan Law & Judicial Minister thil thlente chu a theih anga bawhzui a tum thu a hrilh.

Tanpuina hlan

Lunglei SDO (Sadar) Allan Lalthanzara chuan Governor Discretionary Grant aṭangin nimin khan Lungleia home pali - TNT, Bethel Centre, Kawlkhuma Boys Home leh Baptist Church Orphanage-te hnenah ṭanpuina Rs 25,000 ṭheuh a hlàn. TNT-ah hian mi 660 an awm a, Bethel Centre-ah naupang 70, Kawlkhuma Boys Home-ah naupang 18 leh Baptish Church Orphanage-ah naupang 31 an awm mek a ni.

HSSLC result ṭha lawm

St. Joseph Higher Secondary School chuan nimin khan Vanapa Hall-ah HSSLC 2023-a an result ṭha an lawm a, chief information commissioner Lalnunmawia Chuaungo-in a hmanpui. Khuallian chuan, tumruhna leh tih hrâm hrâmna nunpui tlat tur leh mahni in ṭheuhah an tih theih tâwk hna thawk ṭhin turin zirlaite a chah a, "Zirna kan ngai pawimawh hmasa ber ang a, kohhran leh khawtlanga inhmannain zirna a tibuai tur a ni lo," a ti. HSSLC 2023 top 10-ah St. Joseph HSS zirlai 15 an lang a ni.

Lawmman dawnah an lawm

Mizo National Youth Front chuan thuchhuah siamin, kum 2022-23 chhunga pawl hminga thisen pe ṭhate Association for Voluntary Blood Donation-in chawimawina an hlanah MNYF-in Miscellaneous Category-ah lawmman pakhatna an dawng chu lawmawm an tih thu an tarlang. September 20, 2023-ah Martar Ni pualin thisen pek leh an tum thu an tarlang bawk.