Governor lehkhabu ziah pho chhuak

Governor PS Sreedha-ran Pillai-a'n Covid-19 lockdown chhunga lehkhabu a ziah hrang hrangte pualin August 8, Inrinni khan Raj Bhavan Durbar Hall-ah hun hman a ni a, chief minister Zoramthanga khuallian a ni.

CM Zoramthanga chuan, Larsap chu dan hre mi a nihna leh mipui rawngbawl hna a thawhna te, ziakmi ropui tak, lehkhabu 100 chuang ziak tawh a nihnaahte ngaihsanawm a tih thu a sawi. Chief minister hlui Lal Thanhawla pawhin thu sawiin, inkhàrkhip hun ṭangkaia Governor-in lehkhabu tam tak a ziak hman chu ropui a tih thu a sawi a, Mizoram chanchin leh Mizote chanchin tam zawk ziak zel turin duhsakna a hlân.

Inkhawmah hian PS Sreedharan Pillai kutchhuak thu leh hla lehkhabu 13 chu Chief Minister-in a chhawp chhuak a, lehkhabute chu hmun hrang hrangah a tahtawla tlangzarh tur a ni. Larsap lehkhabu pakhat, 'Corona Kavithakal' tih, Covid-19 chungchanga hlaa a phuah, Malayalam ṭawnga ziah chu Chief Minister-in a tlangzarh a; Gauhati High Court chief justice, Justice Ajai Lamba chuan 'Republic Day 2020' tih leh, 'Thus Speaks the Governor' tih lehkhabute chu Guwahati aṭangin video katlangin a tlangzarh bawk.