Minister pathumin NH-54 kawng leh Lirthei tangkhang dinhmun an enfiah
Minister of state pathum - Lalchhandama Ralte, Lalruatkima leh TJ Lalnuntluanga te chuan August 8, Inrinni khan NH-54 kawngpui chhia leh thawm ṭhat mek vanga lirthei táng khalhtute zinga Covid-19 hripui vei hmuh chhuahte leh ni tin mamawh (essential commodity) châwk luh kawnga harsatna awm theite an thlithlai a; harsatna a awm loh nan sorkar official-te ruahmanna an siampui.
Minister-te chuan, lirthei tangkhang khalhtute leh puitu (handyman)-te'n Covid-19 an vei leh vei loh chak zawka endik a nih theih nan medical screening team dah belh a nih tur thu leh, endikna hmanrua a ṭul angte a rang thei ang bera pek an nih tur thu an sawi. Kolasib DC leh sorkar official dangte an kawmnaah, state páwn aṭanga lirthei lo lut zawng zawng endik tawh tura hmalak a nih thu leh chumi atan chuan thawktute dah belh a nih tur thu te, hmalakna thar avangin ni tin mamawh châwk luhnaah harsatna a awm lo tur a ngaih a nih thu te, mipui tan chîâina tur a awm loh thute sawi lan a ni.
Minister-te chuan, hripui laka mipui himna sorkarin a ngaih pawimawh ang bawkin ei tur mamawh mipuiin an tlakchham lohna turin a venthàwn tel thu an sawi a; lirthei tangkhang enkawltute endik hna kalpui chhungin ni tin mamawh phur lirtheite an luh chhunzawm zel tur thu leh, endikna kalpui zawhah bungraw dang phur truck-te chu an luh chhunzawm theih nan ruahmanna siam a nih thu an sawi bawk.
Minister pathumte hnenah hian Vairengte screening point-a Covid-19 endikna bik buaipui tur doctor mamawh thu an lo thlen chu Health minister Dr R Lalthangliana hnenah a thlen chhâwng nghal a; Health
Minister chuan a rang thei ang bera doctor dah a nih theih nan hmalak a nih tur thu a lo hrilh niin sorkar thuchhuah chuan a tarlang. Minister Lalruatkima chuan, Kolasib-a dah tgur mini RT-PCR chah a ni tawh a, hman theih thuai a nih a beisei thu a sawi. Vairengte leh Kolasib inkara lirthei tangkhang truck driver leh handyman-te ei tur chungchangah, sorkarin Kolasib DC kaltlangin, YMA-te nen a ṭul anga a ngaihtuahpui tur thu minister-te chuan an sawi bawk.
Kawng laka lirthei tangkhang mek zingah, tuialhthei leh eirawngbawlna gas phurte chu ngai pawimawh lehzual a, endik hmasakah nei tura ruahman a ni. Sorkar thuchhuah tarlan danin, truck driver leh handyman zinga hripui veite chu Dedicated Covid Health Centre (DCHC), Polytechnic, Thingdawlah dah nghal zel an ni avangin, an lirtheite chu kawnga hnutchhiah mai loin, a neitute chu senghawi tura tih an ni a; lirthei neitute hriattir an nih hnuah phone number 8974205531-ah inhriattir zel tur a ni.