CM hêkna ACB-in chhui zo tawh

Lengpui Airport tihchang-tlunnaah dan bawhchhiatna a awm nia ngaia chief minister Zoramthanga hêkna chungchang chu Anti Corruption Bureau (ACB)-in an chhui zo tawh a, kalpui zel dan turah Lokayukta-in thutlukna an siam ang.

CM Zoramthanga hêkna chhui tura Mizoram Lokayukta-in a ruat ACB chuan thil ṭul hrang hrang chhui zo tawhin, an chhuina report chu Lokayukta-ah an thehlut tawh. Lokayukta-in hriat belh duh leh hriat fiah duh an neihte chu ACB-ah an zawt leh a, chu'ngte pawh chu ACB-in an chháng tawh a ni.

ACB report hi Lokayukta chuan an zir chiang dawn a, chumi hnuah Chief Minister hêkna kalpui zel dan turah thutlukna an siam ang. Lokayukta hian CM hêkna chu tihtawp emaw, ACB chhui zuitir emaw, CBI chhuitir turin thutlukna an siam thei a ni.

Tarlan tawh angin, Mizoram First Movement (MFM) chuan Lengpui Airport tihchangtlunnaah dan bawhchhiatna a awm nia ngaiin, a mawhphurtua an ngaih CM Zoramthanga chu chhui turin April 11, 2022 khan Lokayukta-ah ngenna an thlen a; Lokayukta chuan bawhzuiin, chhui chiang turin July 2022 khan ACB a hriattir a, ACB-in an chhui ta a ni.

Lokayukta hotute hnen aṭanga Vanglaini thu dawn danin, ACB hnena chhui chiang tura an hriattir hmain Lengpui Airport tihchangtlun chungchangah hian GAD leh PWD-ah thil ṭhenkhat an zawt hmasa a, document pawimawhte an dil bawk.

GAD leh PWD aṭanga an dawnte chu Lokayukta chuan an zir chiang a, MFM-in CM Zoramthanga an puhna chu chhui zui tlakah ngaiin, chhui turin ACB an hriattir a, GAD leh PWD aṭanga chhànna leh document an dawnte pawh an thil tel a ni.

MFM chuan, PWD enkawltu CM Zoramthanga chu a thuneihna hmang sual leh chhungkhat laina duhsak uchuakah an puh a, "India Danpui Article 14 a bawhchhiat avang te, General Financial Rules (GFR), 2017-a rule 162-na leh Vigilance Commission thuchhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak ngei turin Lokayukta-ah ngenna kan thlen a ni," an ti.