Zo fate tawrhna sukiang turin MZP-in Manipuri-te phût

MZP hruaitute chuan nimin khan an pisaah All Mizoram Manipuri Association (AMMA) hruaitute an kâwm a, Manipur buaina avanga Zo fate tawrhna sutkian a nih theihna atana hma la tura an phût thu an hrilh.

Inkawmkhawmna kaihruaitu MZP presi­dent Lalnunmawia Pautu chuan, "Nangni Mizoramah zalên taka in awm laia Manipur-a kan unaute tawrhna hi en liam mai mai harsa kan ti. Thil ṭha zawk a thlen theih nan hma in lak loh chuan in chungah a chhe ber pawh a thleng thei. Manipur-a Zo fate chunga thil thleng ang hi in chungah thleng ve se in duh a nih loh chuan a rang lamin buaina a reh theih nan hma in lak a ngai. In hmalakna kan en zui zel ang," a ti.

AMMA hruaitute chuan, June 14, 2023-a Mizoram Governor kaltlanga India President hnena an thu thlente an sawifiah a, MZP hruaitute pawhin an hmalaknate an tarlang bawk.

Ṭhutkhawmah hian Manipur buaina vanga Zo fate tawrhna sutkian a nih theih nan Meitei hruaitute’n theihtawp chhuahin hma la se an ti a; hemi chungchangah hian Union Home Minister leh Manipur Chief Minister hmuin sawipui ni se an ti.

AMMA hmalakna leh hmalak dan hun remchang hmasa bera thlirho leh turin an ruahman a ni.