National Legislators' Conference-ah Mizoram aṭangin MLA pasarih an tel

MIT-School of Government (MIT-SOG) chuan nimin khan Mumbai-a Grand Hyatt Hotel conference hall-ah National Legislators' Conference (NLC) vawi khatna an buatsaih a, Mizoram Assembly speaker Lalrinliana Sailo leh MLA dang paruk an tel.

NLC-ah hian Lok Sabha speaker ni tawh te, India ram state hrang hrang assembly speaker leh council chairman te, central leh state hrang hrang sorkara mi pawimawhte an tel a; a hawnna inkhawm hi MIT-SOG chief executive officer Rahul V Karad-a'n a kaihruai a ni.

Conference-ah hian Mizoram aṭangin Assembly Speaker bakah MLA dang paruk - KT Rokhaw, Nihar Kanti Chakma, H Lalzirliana, Dr K Pachhunga, Dr Vanlalthlana leh Dr BD Chakma an tel a; IPR secretary Lalhmahruaia Zote leh joint director PB Lianthangpuii, Assembly Secretariat-a officer leh thawktu pali an tel bawk.

NLC hi Jio World Convention Centre, Bandra-ah ni thum chhung neih a ni dawn a; India ram state hrang hrang aṭanga legislator-te'n mahni ram, hnam leh ziaráng inhriat tawnna te, ngaihdan thawh khawm leh sawihona te, democracy ṭhan zelna tura pawimawh te, rorelna ṭha nei tura legislator-te hmalakna tur te, zirna lama hmasawnna rualkhai zawka kalpui dan tur te, sum leh pai dinhmun ṭhanna atana hmalakna tur leh thil pawimawh dangte an sawiho dawn a ni.