SEDP a ṭul angin Rs 3,00,000 thleng pawhin kan inpe dawn - Deputy CM

Deputy chief minister Tawnluia chuan nimin khan a bial chhunga Khawhai town hall-ah Horticulture department-in sapthei zàmna tur thîrzái (galvanised iron wire) an sem a hmanpui a, khelmual laih mek a en bawk. Tawnluia chuan, SEDP hnuaiah a ṭul angin Rs 3,00,000 thleng ṭanpuina an inpek dawn thu a sawi.

Sapthei zàmna tur thîrzai semte chu hlûm (roll) 666 a ni a, quintal 333-a rit niin, Rs 33,30,000 man a ni. Horticulture department leh IFAD FOCUS thawh dunna hnuaia hmalakna a ni a, mi 111 hnenah sem niin, mi pakhatin kg. 300 (hlûm paruk) ṭheuh an dawng a ni.

Deputy CM chuan, kut hnathawktute chawikanna tura sorkarin SEDP a kalpui mek hnuaiah trade hrang hrang a awm thu sawiin, "Ram leilung behchhana eizawnna leh intodelhna siam hi ngaih pawimawh a ni. SEDP phase-I kan thlang zo tawh a, mi 60,000 tan first instalment leh second instalment kan sem zo tawh a, third leh fourth instalment leh a ṭul angin Rs 3,00,000 thleng pawhin kan inpe dawn a ni," a ti.

Tawnluia chuan, Chawngtlai leh Khawhai khuaah nasa zawka sapthei chìn a nih theih nan khawtlang hruaitute leh Horticulture department hotute an inràwnkhawm tawh thu a sawi a, ram leilung leh boruak bakah, a hralhna tur thlenga zir chian hmasak a nih hnuah hmalak a nih thu a sawi.

Sapthei zàmna tura pawimawh thirzái dap leh ngaihtuahnaah theihtawp chhuah a nih thu sawiin Tawnluia chuan, Horticulture department leh FOCUS project hmalakna kaltlangin thirzai ruahman a nih thu a sawi a; a bial chhunga chhungkaw 200 chuangin sapthei chínga bul an ṭan tur chu phûrawm a tih thu sawiin, "Kan ram leilung aṭanga sum leh pai deh chhuah hi kan mawhphurhna liau liau a ni," a ti a, ṭanpuina dawngtute chu hlawhtlinpui ngei turin a fuih.