Party dangte aiin kan felfai hma theih ngei ka beisei - Lalrinpuii

ZPM Southern Headquarters, Lungei president Lalrinpuii chuan June 14, Nilaini khan an pisaah thu sawiin, political party dangte aiin an felfai hma theih ngei a beisei thu a sawi.

ZPM Southern Hqrs. President chuan, an party-in candidate an inruat hma avangin an party chu buai anga sawi an awm thu a sawi a, "Party dangte aia kan felfai hma theihna kawng a nih zawk ngei ka beisei," a ti.

Candidate ruat chungchangah an hruaitute an fimkhur tih sawiin Lalrinpuii chuan, "Bial tinah hnehna kan chan ngei theih nan fimkhur takin hma an la a ni. Hetih lai hian, candidate chang ve ta lote pawh mi ṭha tak tak vek an ni," a ti a; inngur tawn zui mai lo a, ṭha tak leh lungrual taka thawhho zel an duh thu a sawi.

Lalrinpuii chuan, ZPM Lunglei West Block pahnih ṭhiah a nih chungchang sawiin, "Lunglei West bial huam chhungah mi ṭhenkhat tlém azáwngte'n boruak ṭha lo an siam reng avang leh, party hotute thuchhuak an pawm theih loh avangin hreh tak chunga ṭhiah a ṭûl ta a ni," a ti.

ZPM Southern Hqrs. President chuan, thutlûkna harsa leh khirh tak an siam tih sawiin, "Tunah chuan Lunglei West bial chhung aṭang ngei ngei pawhin support kan hmu ṭha chho zel," a ti a; Lunglei West bialah ZPM an chak ngei an inbeisei thu a sawi.