Aizawlah thawhpui neih kan tum lo - Tawnluia

MNF senior vice president Tawnluia chuan, village council leh local council inthlan awm turah MNF party-in LC bikah chuan thawhpui neih an tum loh thu leh, VC ṭhenkhatah erawh a hmaa thawhpui an neih tawh sa HPC nen thawhho an tum thu a sawi.

August 8, Inrinnia Kulikawna MNF zawm thar lawm luhna inkhawmah thu sawiin Tawnluia chuan, "Kuminah budget session kan nei zo chauh a, lockdown kalpui a ngai a, kan rin lohna lamah sorkar sum a kal nasa hle. Sorkar hnathawkte hlawh kan hmang hawh ta hial a ni. Covid-19 boruak a reh hunah chuan theihtawp kan chhuah ang a, development pawh a kal chho zel ang," a ti.

Covid-19 vanga buaina karah Zoramthanga kaihhruai sorkar chu tluang takin a kal zel tih sawiin Tawnluia chuan, "Tun ang reng renga sorkar, kohhran leh khawtlang thawhhona ṭha a awm a la awm ngai lo. Sorkar thu ngaichânga task force-te inpekna a ropui hle a ni," a ti a; Mizoramah hripui vanga thi an la awm lo chu Pathian hruaina a nih thu a sawi.

Deputy Chief Minister chuan, Covid-19 léng karah ei leh bàr phurtu lut leh chhuak an awm lo thei lo tih sawiin, "Hetih lai hian, an zinga ṭhenkhatin Covid-10ṭ9 an kai avangin Mizoram sorkarin inkhuakhirh 

ṭul a ti a, development hnathawh pawh a ṭhuanṭhu lo thei lo. Hripui do hi hautak hle mah se, Pathian zarah kan hlawhtling chho zel a ni," a ti. 

MNF Sr. Vice President hian AMC sorkar hmasa bera councillor Ramhlunsanga, Kulikawn chu MNF party-ah a làwm lut a; Kulikawn LC inthlana MNF candidate turte a puang nghal a ni.