KHAWTHLIR

YMA Hall hawng

YMA, Sialhawk North Branch hall thar, Rs 28,70,000 sénga sak chu nimin khan Khawzawl district bawrhsap K Lalrohlua'n a hawng a; YMA, Sialhawk Branch leh Sialhawk North Branch-in YMA Day an hman a hmanpui nghal.

Lirthei chesualah thi

Nimin chawhnu khan Bilkhawthlir leh Vairengte inkar, Bilkhawthlir khaw thlen hma deuhah bike leh truck an insú a, bike-a chuang Samuel Vanlalhmachhuana (16), New Serchhip chu chêtsualna hmunah a thi a, a ruang damdawi-ina endik a nih hnuah an khua panpui a ni. Bike a chuang mi dang pakhat pawh a hliam a, damdawi-in panpui a ni.

Tuimuk lei hawng

Khawzawl leh Neihdawn inkara Tuimuk lei dawh thar chu June 14, Nilaini khan Champhai North bialtu MLA Dr ZR Thiamsanga'n a hawng. Lei hi cheng nuai 15 senga dawh niin, thla thum chhunga dawh zawh a ni a, lirthei ton 20-a rit dâwl zo tura ngaih a ni. ZR Thiamsanga chuan, Neihdawn khuain châkkhai an lakna kawnga harsatna an tawh ṭhin chu lei dawh tharin nasa takin a sutkian dawn thu a sawi.

Ambulance hlân

Aizawl West-I bialtu MLA Zothantluanga chuan MLA fund hmanga a lei ambulance thar chu nimin khan Luangmual YMA hnenah a hlan a, MLA fund hmanga sak Luangmual YMA hnuaia M Section property house sak thar a hawng bawk. Zothantluanga chuan, aia upa zahna a tlahniam ta nia sawiin, "Ṭawngkam mawi leh hawihháwm hman kan peih ta mang lo. Zo nun ze mawi tivul leh turin theihtawp i chhuah thar leh ang u," a ti.

Manipur raltlan Mi 11,328 awm

Manipur tualchhung buaina vanga sahimna zawnga Mizorama rawn lut an awm belh zel a, nimin tlai dar 5 dinhmun angin mi 11,328 an awm mek. Sorkar chhinchhiah danin, Mizoramah Manipur aṭanga raltlante awmna turin relief camp 34 a awm mek a, raltlan awm mek 11,328 zinga mi 2,816 chu relief camp-ah an awm a, mi 8,512 chu hmun dangah an awm thung.