Thawhhona Thuthlung bawhchhia awm vangin MPF-in press release an siam
Mizoram People Forum (MPF) chuan, tun hnaia Hachhek biala MLA candidate tura puan tawhin ran eng emaw zat talha mipui sang chuang tana ruai a buatsaih chu MPF leh political party-te Thawhhona Thuthlung bawhchhiatna a nih thu an tarlang a; rinawm taka Thawhhona Thuthlung zawm turin political party tin an ngen.
MPF Gen.Hqrs hruaitute nimina ṭhukhawm chuan, tun hnaia Hachhek biala MLA candidate tur pakhatin vantlang ruai a buatsaih chungchang an ngaihtuah a, press release an siam zui a ni. MPF meeting hi president Rev. Dr C Chawnghmingliana'n a kaihruai.
MPF thuchhuah chuan, tun hnaiah Hachhek Assembly constituency-a ding tura political party pakhat candidate puannaah ran eng emaw zat talhin mipui sang chuang tan ruai buatsaih a ni tih hriat a nih thu leh, candidate tura puan chuan higher secondary school leh college hrang hranga zirlaite admission fee tumsak vek a tum thu a puang bawk tih thu an dawng tih an tarlang.
MPF chuan, "Inthlan campaign nana ruaiṭheh, sum, therhlo leh a thlâwna thil tihsak intiam hi MPF leh political party-te Thawhhhona Thuthlung bawhchhiatna a ni. MPF chuan he thil thleng hi a la thu tak hle a, hetiang thil hi khawi hmunah mah thleng tawh lo se kan ti a, MPF chuan party hrang hrangte chêt dan hi thlirin a vil zui zel dawn a ni," an ti.
MPF leh political party-te nena Thawhhona Thuthlung chu rinawm taka zâwm zel turin MPF chuan political party zawng zawng a ngen thar leh tih an tarlang bawk.
MPF hruaitute chuan, Thawhhona Thuthlung chu political party tinin an pawm leh hming an ziah hnan thlap a nih thu sawiin, political party-te'n an pawm tawh a nih avangin ṭha takin an zâwm mai tura an ngaih thu an sawi.
MPF leh political party-te Thawhhona Thuthlung bung 2(4)-ah chuan, 'Mipui vantlang tana ei leh in siam - ruai, chawhlui kîl ho, sawhchiar pir leh a chi dang te, picnic-te hi a hautak em em a. Candidate-te tan ngei pawh sum tam tak sên theihna a nih ṭhin avangin tih loh tur a ni,' tih a ni.