Primary zirtirtute'n naupang huaisen an chawimawi; Lawmman sang a dawn theihna atan hma la dawn

Mizoram Primary Teachers' Association (MPTA) chuan nimin khan a nau a chhanna lama nunna chán Anthony Vanmawia (9) s/o Joshua Lalrinngheta, Tuirial Veng chawimawi inkhawm Zarkawt Community Centre-ah an buatsaih a, Education director Lalsangliana'n a hmanpui.

Education Director chuan, Anthony-a hian pi leh pute aṭanga kan inzirtir ṭhin huaisenna leh Kristiante kan inzirtirna mahni inphata midang tana nun tih chu a rawn pho chhuak tih sawiin, "Hei lo liama kan ram tana chawimawi phu an awm chuang lo," a ti a, chawimawina sang zawk a dawn theihna atana hmalak a nih tur thu a sawi.

MPTA president R Zonunmawia chuan an hun hman chu hman ngai lo se, hlim taka awm tlan chu an duhthusam a nih thu sawiin, "Mah se, hetiang thil a lo thlen takah chuan kan hman ngei a ngai si. Anthony-a thihna hi kan sún a, amah kan ngai em em a ni. Chuh­tihrual erawh chuan a thih chhan kan chhuang hle," a ti.

MPTA hian Anthony Vanmawia chawimawina atan a chhungte hnenah Rs. 10,000 leh thuziak an hlan.

Anthony-a hi Govt. Primary School, Tuirial Leikaiah sikul a kal a, April 17, 2023 khan an sikul bang chu an sikula lut ve tho a nau Vanlal­hmunsiama (9) leh an ṭhian dangte nen an sikul bula luiah inchiah dai turin an kal a ni.

Vanlalhmunsiama hi balu lakna lai tui thuk laiah a chesual a, Anthony-a hian a hmuh veleh tuiah zuanglut nghalin, a nau hi tui aṭangin a nawr chhuak thei a, Anthony-a erawh tuiah a tlahlum zui ta a ni.