NEET-UG-ah Mizorama pakhatna India ram pumah 1,60,855-na a ni

Damdawi lam kaihhnawih zirna (course) hrang hranga zir tur thlanna, National Eligibility cum Entrance Test 2023 (NEET) under graduate result chhuakah Mizoram aṭangin mi 913 an tling a, Mizorama ti ṭha ber chu India ram pumah 1,60,855-na a ni.

Thu dawn danin, MBBS, BDS leh medical course dangte zir tur thlanna, NEET 2023 result hi June 13, 2023 khan a chhuak a, India ram pumah exam hmachhawntu mi 20,38,596 zinga 11,45,976 chuan pass mark hmu tlingin, medical course hrang hrang zir turin an tling a ni.

Mizoram bikah NEET-UG 2023 exam tuma inziak lut mi 2,024 zinga mi 1,951-in exam an hmachhawn a, chu'ng zinga mi 913 chu an inziak tling a ni. Nikumah khan Mizoram aṭangin mi 1,359-in hmachhawnin, mi 587 an tling.

NEET 2023-a Mizorama pakhatna chu Rakesh Dey, Lunglei Bazar Veng niin, mark 452 a hmu a, India ram pumah erawh 1,60,855-na a nih bakah, state leh union territory tina ti ṭha berte zingah 38-na a ni thung. Ram puma mark hmu sang ber pahnih - Prabanjan J, Tamil Nadu leh Bora Varun Chakravarthi, Andhra Pradesh-te chuan mark 720 (99.99%) ve ve an hmu a ni.

Mizoram chuan kum 2022 khan Bachelor of Medicine and Bachelor of Surgery (MBBS) seat 82 leh Bachelor of Dental Surgery (BDS) seat 12 a nei a; mahse, NEIGRIHMS, Shillong-a seat a neih pathum chu kumin aṭangin tihtawp a nih avangin MBBS seat hi kuminah chuan a tlahniam hret tura ngaih a ni.