Sorkar turin kan inbuatsaih a, kan sorkar dawn - Lalsawta

Mizoram Pradesh Congress Committee (MPCC) president Lalsawta chuan, Mizoram tana sorkar ṭha siam tura an rinchhan chu Pathian a ni tih sawiin, "Sorkar turin kan inbuatsaih a, kan sorkar dawn," a ti.

Nimina Congress Bhavan-a political session-ah thu sawiin Lalsawta chuan, "Mizoram tana sorkar ṭha siam turin kan rinchhan chu Pathian a ni. Ama lam kan en a, amah nen chuan theihna kan nei a, kan zâm rêng rêng lo. Sorkar turin kan inbuatsaih a, kan sorkar dawn a ni," a ti a; Pathianin hna a thawh chuan ṭawngṭaia an dil phâk pawha an ngaih loh thlengin a chháng niin a sawi.

MPCC President chuan, MLA candidate nih vanga thisena inzawmna nei si loa chhungkhat lainá anga chhâla 'In inah chaw ka lo ei dawn,' tih thar chiam chu thil hlauhawm leh bànsan tur chi a nih thu a sawi a, "Kan ram tidanglam theitu leh kan duh ang min duhpuitute nen ram siamṭha turin theihtawp kan chhuah a ṭul zawk a ni," a ti.

Thusawi thiam leh infak mawi chiam aiin nunin thu a sawi zawk tur a nih thu sawiin Lalsawta chuan, "Mipui inang, ram leilung inang, enkawl dan a inan loh vanga dinhmun inthlau tak an awm. Dik tak leh fel taka ram leh mipui enkawl thiam apiang an ding chhuak mai ṭhin," a ti a; Mizo hnam leh sakhua himna turin Congress party an sorkar dawn niin a sawi.

Congress party President chuan, MPCC treasurer aṭanga châwl ta Zodintluanga'n Congress party tan nasa takin hna a thawk a, mi thar a lawm luh ṭeuh thu te, MLA Lalrindika Ralte chungah Hachhek bial mipuiin rinna an nghah thu te, MLA KT Rokhaw pawhin a bial tan a thawh hlâwk thute a sawi bawk.

Congress Mahila president pawhin thu sawiin, "Politics leh party kan zawm chhan chu ram leh hnam tan a ni tur a ni a, contract hna leh sorkar hna kan duh ang kan hmuh loh vanga vui ve mai mai thei kan ni lo," a ti a; chutih laiin, MNF sorkarah mithiam leh theihna nei tan hmun a awm lo a, duhsaktu nei lo ṭhalaite tan an thiamna hmanga an inelnain awmzia a neih loh thu a sawi.

Vanlalawmpuii Chawngthu chuan, vote thlak uluk a ngai tih sawiin, "Vote thlâk kan uluk loh avangin kum nga chhung awmze nei loin kan awm a, kan ram hma lam tur thui tak a hril a ni. Sorkar hnathawk hlawh lâk theih loh, dan leh hrai mumal loh chhan hi vote thlak kan uluk loh vang a ni. Mi duhâm leh hlemhlê roreltu kan neih lohna turin rilru fím tak púin vote hmangin danglamna kan siam a ngai," a ti.

Inkhawmah hian MPYCC president Laltawnliana, MPCC Media chairman Dr Lallianchhunga, Social Media chairman C Lalhriatpuia leh NSUI Mizoram president RB Lalmalsawma ten thu an sawi bawk.