Hnahthialah zirlai ti ṭha chawimawi

Samagra Shiksha chuan nimin khan Hnahthial Electric Veng community hall-ah career guidance leh zirlai ti ṭhate chawimawina an buatsaih a, bialtu MLA leh minister Dr R Lalthang­liana'n a hmanpui.

Dr R Lalthangliana chuan, zirlaia pass satliah tan hna hmuh a har thu sawiin, "Thiamna tak tak neih a ngai. Zirtirtute pawhin an zirlaiteah chhawr tlak thiamna an pe thei tih an inhriat thar ka duh a, chutiang tura an inbuatsaih ka beisei," a ti.

Zoram Medical College-a department hrang hranga hna an lâk dawnin Mizo ṭhalai zingah tling thei an váng tih sawiin Minister chuan, "Hnam dang sàwm a ngaih cháng a awm. Super specialist doctor pawh Mizo nula tlangval zingah kut zungṭang thliah tham lek an awm a, pilot pawh Mizo zingah panga an awm tling lo. All India service lamah pawh sawi tur an váng. Kan rualpàwl dan hi kan inenfiah a ngai," a ti a; hlawtling tur chuan daih rei leh peih rei a ngaih thu a sawi.

Inkhawmah hian Hnahthial centre aṭanga HSLC leh HSSLC pass tharte hnenah lawmpuina hlan a ni a; Hnahthial College hnenah tun hnaia award an dawn lawmpuina hlan a ni bawk.