P/S zirtirtute hnenah tablet sem ṭan

Samagra Shiksha, Mizoramin sorkar primary school zirtirtute hnena naupang zirtirnaa hman ṭangkai tura a pek tablet-te chu nimin khan MRB Head Office Conference Hall-ah sem a ni. School Education secretary Dr Lalzirmawia Chhangte chuan, zirlaite hlawhtlin leh hlawhchhamah zirtirtute'n mawh an phurh ngam a ngai tih sawiin, "Naupangte an hlawhchham hian zirtirtute'n an hlawhchham tih an inhriat a ngai," a ti.

Dr Lalzirmawia Chhangte chuan, naupang zirtirna atana tablet pekte chu ṭangkai taka hmang turin zirtirtute a chah a, "Khawvel hmasawn zelah thil thar a lo chhuak zel a, kan zirnain ken tel a ngah sâwt hle. Zirlaite mamawh phuhru turin zirtirtute pawh intuai thar a ngai a ni," a ti.

School Education Secretary chuan, "Infor­mation technology-a innghat zirna hi kan uar zel dawn avangin IT-ah ṭan lak a ngai hle. Social media hman thiam ngawt a tâwk lo a, zirtir nana IT hman thiam a pawimawh ta hle a ni," a ti a; thiamna leh hmanraw thar hman kawngah hma hruaitu nih theih loh pawhin, ûm phâk ve zel a ṭul thu a sawi.

Tablet semna inkhawmah hian Samagra Shiksha leh Institute of Advanced Studies in Education (IASE)-te'n research project an siam, 'A Study on Vocational Interest of Secondary and Higher Secondary School Students in Mizoram' tih chu tlangzarh a ni.

Inkhawmah hian Samagra Shiksha state project director Lalhmachhuana pawhin thu a sawi a, IASE principal Prof. Lallianzuali Fanai-in research report a pe. Research project thar, 'Identification of Learning Problems of Secondary School Students in Mizoram' atan Samagra Shiksha leh IASE chuan thawh dunna an ziak leh nghal bawk.