NH-54 kawngpui la tlang lo; Chhungkaw 11 an inthiar chhuak

Nimin zing khan NH-54 kawngpui chung, Vaivakawn thlânmual bulah lei a min a, in rel lai pakhat a chhilh bakah, NH-54 kawngpui a hnawh ping. Leimin vang hian chhungkaw 11 an inthiar chhuak.

Kawngpuiah lirthei tlân tlang theih a ni lo a, nimin khan lirthei kal tlang theiha thenfai tum ni mah se, tihtlang hman a ni lo.

Traffic SP aṭanga thu dawn danin, Zohnuai RK Road-ah chhuk záwngin LMV leh two wheeler kal theih a ni a, chho zawngin two wheeler chiah kal phal a ni. Sakawrtuichhun lam kawngah LMV leh a aia tête chhuk leh chho zawngin tlân theih a ni a, HMV leh MMV-te tlan phal a ni lo.

Leimin avang hian in pathuma chhungkaw 11-te chu an bungrua thiarchhuah niin, chhungte belh tur nei remchang lote chu BSUP, Rangvamualah dah an ni ang.