Robert Romawia'n Union Home Secretary a kâwm

Minister of state Robert Romawia Royte chuan nimin khan New Delhi-ah Union Home secretary Ajay Kumar Bhalla chu a pisaah a kâwm a, Mizoram sorkar kuta Lammual hlan chungchang leh Manipur buaina avanga Mizorama tlanchhiate chungchang a sawipui.

Robert Romawia Royte chuan Union Home Secretary hnenah hian Lammual chu Assam Rifles-te'n a rang thei ang berin Mizoram sorkar kuta an hlan a ṭul thu a sawi a; Lammual hmuna Laldenga Centre sak tur lungphûm Home minister Amit Shah-a'n a phûm tawh chu hna ṭan vat a ṭul thu sawiin, NOC pe chhuak turin a ngen a ni. Union Home Secretary chuan tihfel thuai an tum thu a lo hrilh niin sorkar thuchhuahin a tarlang.

Manipur tualchhung buaina kaihhnawiah Mizoram sorkar hmalak dante sawiin Minister chuan, "Tun dinhmunah Manipur râltlân mi 11,328 Mizoramah an awm. Raltlante hi naupang, hmeichhia leh pitar putar chauh an ni tlangpui a, mipa ṭhalaite chu an in leh lo véng turin Manipur-ah an awm. Nimin thlenga thil thleng khan Manipur tualchhung buainain ziaawm lam a pan thei lo tih a tichiang a, thûk zawka sorkar laipui a inrawlh a ṭul tak meuh a ni," a ti.

Robert Romawia chuan, Manipur ráltlânte chu Mizoram sorkar, tlawmngai pawl leh kohhrante'n a theih ang angin an enkawl a, sorkar laipui puihna an mamawh hle tih Union Home Secretary a hrilh a; Mizoram sorkarin raltlante enkawl nan Home Ministry-ah sum pe tura rawtna a thlente chu rang taka pe tura ngenin, sanction vat a nih loh chuan thil ṭha lo zawk thleng thei a nih thute a hrilh bawk.

Union Home Secretary chuan Mizoram Chief Minister rawtna a lo hriat tawh thu sawiin, Manipur aṭanga sahimna zawnga Mizorama ráltlânte ṭanpui nan Mizoram sorkar hnenah sum pek thuai a nih tur thu a lo hrilh.

Minister Robert Romawia hi Mizoram Home secretary H Lalengmawia'n a ṭawiawm a ni.