KHAWTHLIR

SAY-in thisen pe

Salvation Army Youth, Garodpunjee Corps-te chuan June 25, 2023-a SAY Sunday thleng tur pualin nimin khan Kolasib District Hospital-ah thisen pek an huaihawt a, hmeichhia panga leh mipa pali, an vaiin mi pakuain thisen an pe.

EFCI-in tanpui

Evangelical Free Church of India (EFCI) kohhran chuan Manipur aṭanga sahimna zawnga in leh lo chhuahsante chhawmdawlna leh ṭanpuina atan nimin khan Central YMA hnenah Rs 2,00,000 an hlan. Pawisa hi CYMA president R Lalngheta leh office bearer dangte'n an lo dawng a ni.

MNF inkhawm

MNF party chuan nimin khan an pisa, Mizo Hnam Rûnah chhung inkhawm an nei a, MNF Gen.Hqrs adviser Ramnundanga'n thu sawiin, MNF-in zalenna an sual chungchangah thu dik lo hmanga kaihlek ching an awm niin a sawi a, "Mithiam ziak zingah zalenna sual hre ve phak lote'n zalenna sual an kaihlek hmuh tur a awm ṭhin hi a rilru natthlak hle a ni," a ti.

ZPM inkhawm

ZPM party chuan nimin khan an pisaah political session an nei a, ZPM Political Affairs Committee member K Laltluangkima'n thu sawiin, "Kalphung thar, mipui sorkar tih kan aupui mek hi politics game satliah mai ni loin, hnam din khawchhuahna tak tak, mipui náwlpui tana hmasawnna thlen thei tur thil a ni," a ti. Phuldungsei khuaa MNF ṭhalai president leh mi dang 11 chu ZPM vice president Lalthansanga'n an party-ah a lawm lut niin ZPM chuan an tarlang.

Minister-in hmanpui

Minister C Lalrinsanga chuan nimin khan Mizo Upa Pawl, Lunglei Venglun unit-in MUP Rûn-a an din champha vawi 47-na an lawm a hmanpui a; MUP member-te chu khawtlang inrêlbàwlna leh hmasawnna kawnga hmalaknaah mipui finchhuahtu ni turin a sáwm. Venghlun MUP unit hi June 16, 1976-ah din a ni a, member 171 an awm a ni.

CM-in hmanpui

YMA, Ṭhuampui Branch chuan June 15, Ningani zan khan Rajat Auditorium, Ṭhuampuiah YMA Day an hmang a, bialtu MLA Zoramthanga, chief minister-in a hmanpui. YMA chu Mizo khawtlang nuna langsar berte zinga mi leh hna pawimawh tak thawk a nih thu sawiin Zoramthanga chuan, "YMA kumpuan 'Ram leh hnam humhalh' hi tun hnai kan hun tawnah a pawimawh lehzual. Rambuai vanga ram leh state ṭhenawm aṭanga kan unaute rawn raltlan eng emaw zatte theihtawpa lo tuamhlawm hi kan tih àwm rêng a ni," a ti.