Manipur tualchhung buaina chungchangah Manipur CM-in Mizoram CM a rawn bia
Manipur tualchhung buaina leh a nghawng kaihhnawihah chief minister Zoramthanga leh Manipur chief minister N Biren Singh te chu nimin chhun khan telephone-in an inbia. Manipur CM chuan an state-ah boruak ṭha a awm thuai theih nan leh remna a awm theih nan theihtawp chhuahpui turin Mizoram CM a sáwm.
CM Zoramthanga chuan Manipur CM nena an inbiak thu hi Instagram-ah a tarlang a; Manipur CM N Biren Singh-a'n June 18, Pathianni chhun dar 12:30-ah telephone-in a rawn biak thu tarlangin, "Manipur buaina chungchangah boruak ṭha an neih thuai theih nan leh remna a awm theih nan theihtawp chhuahpui turin min rawn sáwm a. Mizorama Meitei awm mekte him taka an awm theihna tura theihtawp chhuahpui turin min rawn ngen nghal bawk," a ti.
Zoramthanga chuan, "Mizoram sorkar chuan Manipur-a buaina thleng mek chu pawi a tiin, buaina a reh theihna tur pawhin theihtawp a chhuah reng," a ti a; Manipur sorkar leh sorkar laipui hmalaknate thlir reng chungin, buaina a reh theihna tur leh remna a awm theihna tura hmalakna awmte chu an thlàwp reng thu a lo hrilh tih a tarlang.
CM Zoramthanga chuan, "Mizoram chu a rálmuang a, sorkar leh NGO-te pawhin Manipur-ah remna leh muanna a awm theih nan leh Mizorama awm Meitei-te him nan theihtawp an chhuah mek reng a. Chuvangin, Mizoram chhunga awm Meitei-te tan Mizoramah hlauhthawn tur a awm lo. Him taka an awm theihna tura hmalak mekna pawh chhunzawm zel a ni ang tih thu ka lo hrilh bawk a ni," a ti.