Mizoram sorkarin OMB hmangin cheng vbc. 100 a pûk leh dawn

Mizoram sorkar chuan open market borrowing (OMB) hmangin loan cheng vbc. 100 a pûk leh dawn a, sorkar kum kal meka ṭum hnih a pûkna tur a ni.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu Reserve Bank of India (RBI)-in a buaipui a; RBI chuan OMB hmanga Mizoram sorkarin sum pûk tur zawn a nih thu June 16, 2023 khan a tarlang.

OMB hmanga sum pûk a nih theih nan RBI-in state sorkar tan sum pûktir thei tur a zawng a, financial institution-te'n an chháng ṭhin. Mizoram sorkar sum pûk tur chháng duh tan RBI chuan June 20, 2023 thleng hun a hawng.

OMB hmanga sum pûk chu kum khatah a pung vawi hnih rulh tur a ni a, kum 10-15 velah sum pûk zawng zawng rulh a ngai a; a punna chu 7-8% vel a ni.

Mizoram sorkar hian kumin sorkar kum kal meka a ṭum khatna atan May thla laihâwl khan OMB hmangin cheng vbc. 250 a pûk a; June thlaah a pûk leh chuan financial year kal mekah vawi hnih a pûkna a ni ang.

Mizoram sorkar hian sorkar kum liam ta, 2022-23 chhung khan OMB hmangin cheng vbc. 1,315 a pûk nia thu dawn a ni.