Mamit dist-ah ni 4 kawlphetha nei lo; Khaw 3 hnatlangin an chhuak

Mamit district-a khaw pathum - Saikhawthlir, Chuhvêl leh Kananthar khaw mipuite chu ni li chhung kawlphetha an neih loh avangin June 17, Inrinni khan an hnatlang.

Hnatlangah hian mi 150 vel an thawk chhuak a, khaw pathuma VC-te'n an ei leh in tur an tum. Hnatlangte chu Power & Electricity department-a thawk mi pathumin an kaihruai.

Hnatlangte hian electric line hrui chat hmun thuma mi leh a ban tlu hmun hniha mi an siamṭha a, Inrinni zan dar 8 vel aṭang khan khaw pathumte hian kawlphetha an hmu leh thei a ni.

Hachhek bial châwm­tu electric line hi Bairabi aṭangin 33kv Zamuangah lak a ni a, Zamuang aṭangin Bairabi lamah Chuhvel, Saikhawthlir, Kananthar leh Suarhliap thlengin 11kv hmanga pek a ni.

Kawlphetha lakna kawngah hian forest plantation leh mimal huan tam tak a awm avang leh line a hlui tawh em avangin electric current a khaihlak nasa ṭhin a; electric current an lakna chu sorkarin ngaihsak se an duh thu khaw pathum khawtlang hruaitute chuan an sawi.