RD Minister dâwngdah vangin Mizoramin sum ṭhahnem tak kan chân phah - ZPM

ZPM Ṭhalai leh Zonu hruaitute chuan June 17, Inrinni khan Aizawl Press Club-ah thuthar thehdarhtute an kâwm a; Rural Development minister Lalruatkima dâwngdah vangin hmeichhiate hamṭhatna tur sum ṭhahnem tak Mizoramin a chán niin an sawi.

ZPM Ṭhalai leh Zonu hruaitute chuan, Mizoram State Rural Livelihoods Mission (MzSRLM) hnuaiah district, RD block leh village tinah self help group (SHG) 9,200 a awm tawh a, SHG-ah chuan member hmeichhia 74,000 an awm mek tih sawiin, "Khaw tinah SHG pakhat tal a awm tawh anga chhût a ni. Hmeichhiate hamṭhatna turin kum 2022-23 khan SRLM hnuaiah annual action plan atan cheng vbc. 174.13 approve a ni a, mahse, Mizoram sorkarin first instalment cheng vbc. 39.18 chiah a hmang," an ti.

Kum 2017 aṭanga tun thlengin annual action plan budget pumpui aṭangin first instalment 25% bak sum hman a ni ngai meuh lo tih a thuphunga an hriat thu sawiin Zonu hruaitute chuan, "Sorkarna lo chelh tawhtu MNF leh Congress-te hian hmeichhiate hamṭhatna tur an ngaihtuah tâwk lo niin kan hria," an ti a; sum tam tak pawm tawhte chu ṭangkai taka hman ni ta se chuan, Mizo hmeichhiate'n nasa zawkin hma an sawn a rinawm thu an sawi.

ZPM Ṭhalai leh Zonu hruaitute sawi danin, SRLM hnuaia sum pawm tawh hman a nih loh chungchangah hian Union Minister chuan Chief Minister hnenah lehkha a thawn a ni.

SHG hmalaknate ṭha leh felfai taka kal turin viltu leh enkawltu tur thawktu awm ṭhat a ngai tih sawiin ZPM Ṭhalai leh Zonu hruaitute chuan, "Tunah hian staff awm tur zat 469 aṭangin mi 271 (58%) chiah Mizoramin kan nei mek. SEDP board phuahchawpah vice chairman MLA ni lai leh staff an awm thluah theih laia SHG enkawltu tur staff kan nei mumal leh si lo hi MNF sorkar hnuaia hmeichhiate hmasawnna tur rahbehna lian takah kan ngai," an ti.

MNF sorkar chu tun aia hmeichhiate hamṭhatna turah ngaihtuahna séng tura ngenin, "Sum tam tak approve tawh sa a awm laia hman loha a luang ral hi a changtu minister Pu Lalruatkima dâwngdah vangah kan ngai. AR insawn chhuah chungchanga an atta nuaina leh kel sa kanna bél nena AR-te’n Lammual an chhuahsan tawh anga uar taka dâwt sawitu minister hian a department chana hmeichhiate hamṭhatna tur sum luang ral hi a hre lo em ni?" an ti bawk.