CSS hnathawk lungawi loin ni 3 chhung badge dum an bel dawn

Centrally sponsored scheme hnuaia thawkte intèl­khawmna, All Mizoram CSS Employee Coordination Committee (AMCECC) chuan CSS hnuaia thawkte chung­changa Mizoram sorkarin a din Study Group rawt­nate hmang thuai tura sorkar kar nan naktuk Thawhlehni aṭangin ni thum chhung badge dum an bel dawn.

AMCECC hruaitute chu June 16, 2023 khan an ṭhukhawm a, Study Group on CSS-in rawtna (recommendation) a siam tawh chungchang an sawiho. June 1, 2023 khan an lo ṭhukhawm tawh a, chutah chuan Study Group rawtnate chu June 15, 2023 ral hmaa tihlawhtling turin sorkar an phût a, a hlawhtlin loh avangin an kal zel dan tur June 16 khan an ngaihtuah ta a ni.

Mizoram sorkar aṭanga thu lawmawm an hriat loh avangin AMCECC chuan lungawi lohna lantir nan June 20-22, 2023 chhungin hna an thawhna hmun ṭheuhah badge dum bel an rêl a; June 16 tlai khan Deputy Chief Minister hnenah memorundum an thehlut bawk.

Study Group on CSS-in kum hnih dawn an zir chian hnuah rawtna siamin Mizoram sorkarah an thehlut tawh tih sawiin AMCECC chuan, "Kum 2021-a Study Group din ni tawh si, tun thlenga recommendation an siamte tihhlawhtlin a la ni lo hi pawi kan ti hle a ni," an ti.

AMCECC chuan, "Lungawi lohna lantir nana hreh tak chunga badge dum bel a ngai hi pawi kan ti hle a, kan thil phûtte hi sorkarin min tihhlawhtlinsak ngei se kan ti hle a ni," an ti a; a hlawhtlin theih nan hmalak zel an tum thu an tarlang.

Sorkar laipui aṭanga CSS sum rawn kalte chu a hun takah nodal agency hnenah pek chhuah a ni lo ṭhin tih sawiin AMCECC chuan, "Hmasawnna hna thawhna tur sum leh hlawh a hun takah CSS employee-te'n kan la thei lo ṭhin hi, central guidelines angin ni 21 hma ngeiin a dawng tur nodal agency-ah pek chhuah kan phût," an ti bawk.