MP-in Central-ah KMMTTP a bawhzui

Rajya Sabha MP K Vanlalvena leh MP hlui Vanlalzawma te chuan June 16, 2023 khan New Delhi-ah External Affairs secretary (East) Saurabh Kumar chu a pisaah an kâwm a; Kaladan Multi Modal Transit Transport Project (KMMTTP) kawng laih leh Mizoram-Myanmar inrìna Zorinpuia border trade centre din chungchang an sawipui.

K Vanlalvena chuan, Zorinpui leh Myanmar rama Paletwa inkara kawngpui sial lai mekah lei laih bik chu zawh a ni tawh tih an sawi a; kawngpui a tlang hnuah chauh border trade centre din a nih chuan in sak chhungte nen hmasawnna a tihkhawtlai theih thu External Affairs secretary Saurabh Kumar an hrilh. Saurabh Kumar chuan, kawng a tlang ruala trade centre peih hman a nih theih nan hmalak thuai a nih tur thu a sawi.

External Affairs Secretary chuan, KMMTTP kawng laihnaah harsatna chi hrang hrang avangin hna thawh chak a harsat thu leh tunah chuan hna a tluan viau tawh thu a sawi a; Bay of Bengal aṭanga Chhimtuipui lui kaltlanga Mizoramah bungrua a luh hunah chuan Mizoram mai ni lo, hmarchhak state dangte tan chhenfâkawm tak a nih a beisei thu a sawi bawk.

KMMTTP hi India sorkar leh Myanmar sorkarin April 2008-a inremna thuthlung an ziah hmanga bul ṭan a ni a; Mizoram chhung bikah chuan kum 2011 tìrah khan kawngpui laih hna ṭan a ni.