Speaker-in Mumbai Mizoram House a tlawh

National Legislators Conference chhima Mumbai-a chám mek Assembly speaker Lalrinliana Sailo chuan June 17, Inrinni khan Mizoram House a tlawh a, Damlo Welfare Committee hruaitute hnenah a ṭula hman atan Rs 30,000 a hlan.

Lalrinliana Sailo chuan, Mumbai Mizoram House-a thawkte chu damlote tana an inpekna leh Mumbai-a Mizo awmte'n harsatna an tawh chánga an buaipui ṭhin danah fakawm a tih thu a sawi a, "Mi lian leh mi tê thliar loa damlote an hmasak dan indawta accomodation pek an ni ṭhinte hi a ṭha a, mite tan malsawmna lo ni zel ang che u," a ti.

Mizoramah cancer vei an tam avangin health minister a nih laiin cancer vanga thihna tihniam turin theihtawp chhuah a nih thu sawiin Lalrinliana chuan, "Cancer tamna ram Japan-ah Mizo surgeon pahnih tirh an ni a, an lo haw hnuah cancer natna vei damlote phaia thawn pawh nasa takin a tlahniam," a ti a; cancer enkawlnaah natna hmuh chhuah hma a pawimawh avanga hmalakna an kalpui, early detection drive chu beisei anga a hlawhtlin loh avangin pawi a tih thu a sawi.

Mizoram House deputy resident commussioner Lalruatliana pawhin thu sawiin, Mizoram House dinhmun leh khum indaih lohna vanga harsatna an neih te, Mizoram House building-a cheng ve hnam dangte leh Mizo inkara harsatna awm ṭhinte a sawi.

Speaker hi MLA pahnih Nihar Kanti Chakma leh Dr BD Chakma ten an ṭawiawm a ni.