Leimin vangin Vaivakawnah in ṭhiat; leiminin a hnawh kawngpui a la tlang lo

Vaivakawn thlânmual bul, national highway chhakah June 16, 2023 zinga lei a min hnua a bul hnaia in, hlauhthawnawma ngaih pakhat chu June 17, Inrinni khan Vaivakawn khaw­tlangin hnatlangin an ṭhiat. Leiminin NH kawngpui a hnawh pin chu nimin tlai thleng khan lirthei tlân tlang theih turin thenfai a la ni lo.

Thu dawn dan, leimin vanga in ṭhiah tak chu Lalthantluanga in, cement concrete a ni a, in innghahna lei a chet avangin sorkara mithiamte thuràwn angin ṭhiah a ni. A bula in dang, Assam type erawh chu ṭhiat rih loin, lei chêt dan azira ṭhiah turin an ti thung.

Traffic SP Stephen Lalrin-awma hnen aṭanga thu dawn danin, Vaivakawn hnuai, Hunthar Veng piaha leiminin NH kawngpui a hnawh pin chu thenfai hna thawh mek a ni a, mahse, ruah a tlâk deuh reng avangin duh angin thenfai hna a chak thei lo a, nimin tlai thleng khan lirthei tan tlan tlang theih a la ni lo. Traffic SP chuan, nimin bikah chuan lirthei tlân theiha thenfai zawh hman an beisei loh thu a sawi.

NH kawngpui a pin avang hian lirthei laihâwl, medium vehicle-te chu tlang kawng (Durtlang-Kawnpui) lamah tlan phal a ni a, Kawnpui lam aṭanga Aizawl lam pan tan zing dar 6 aṭanga tlai dar 6 thleng tlân theih niin, Aizawl lam aṭanga Kawnpui lam pan tan tlai dar 6 aṭanga a tuk zing dar 6 thleng tlan theih a ni. Lirthei lian, heavy vehicle-te erawh tlân phal a ni lo.