Manipur-a Mizote ṭanpuina tur vailiam

Indian Youth Congress (IYC) leh Mizoram Pradesh Youth Congress Committee (MPYCC) Relief Team chuan Manipur tualchhung buaina avanga harsatna tâwk mek Mizote chhawmdawlna pek tumin nimin khan Manipur an pan a, Aizawla Congress Bhavan aṭangin MPYCC president Laltawnliana'n a vailiam.

Vawiin June 19 hi Rahul Gandhi pian champha a ni a, he ni pual hian Indian Youth Congress (IYC) chuan state hrang hranga Congress ṭhalaite chu mi dangte ṭanpuina ní atan hmang turin a chah a ni.

IYC duh dan angin MPYCC chuan Manipur state chhunga Zo hnahthlak, an chenna in tlansana relief camp-a awm mekte ṭanpui an rêl a; ṭanpuina tur ni tin mamawh chi hrang hrang leh damdawite chu nimin khan Manipur an panpui a, Manipur-a Indigenous Trible Leader Forum (ILTF) hotute hnenah an hlan dawn a ni.

MPYCC president Laltawnliana chuan, Mizoram Congress party-in Zo hnahthlakte engtik lai mahin an en hrang ngai lo nia sawiin, "Congress ṭhalaite hian thla hmasa khan Thingdawl leh Rengtekawna Manipur aṭanga kan Zo hnahthlak rawn ráltlante ṭanpuina pein kan tlawh tawh a, a theih ang anga ṭanpui zel kan tum," a ti.