PUC-in zirlai chhuak tur 1,035 an thlah

Pachhunga University College chuan June 17, Inrinni khan an auditorium-ah Grad Dinner an buatsaih a, Mizoram University vice chancellor Prof. Dibakar Chandra Deka-a'n a hmanpui. PUC zirlai chhuak tur 1,035 thlah an ni.

Prof. Dibakar Chandra Deka chuan, India ram college ṭha berte zinga mi PUC aṭanga zir chhuak turte chu a lawmpui thu sawiin, "Khawvel hi in tana zuan luh theihin a inhawng a, in zuang lut dawn," a ti a; zirlaite chu an hlawhtling zui viau a, ram changkang tak takah an kal a nih pawhin, mahni ram leh zir chhuahna hmun theihnghilh lo tur leh mahni rama lêt leh turin a chah.

PUC principal Prof. H Lalthanzara pawhin thu sawiin, zirlai chhuak turte chu an thawhna apiangah rinawm taka thawk tur leh an zir chhuahna hre reng turin a chah a; vice principal HS Lalsangpuia'n rinawmna ngai pawimawh tur leh Mizo hnam hmakhua ngaihtuah turin a chah bawk.

PUC hian kum 2006 aṭangin an zirlai chhuak turte thlahna atan chawhlui, Grad Dinner an buatsaih ṭhin a; kuminah hian BA mi 569, B.Sc. 314, B.Com. 68, BBA 39, MA mi 22 leh M.Sc. mi 22, an vaiin mi 1,035 an tlah a ni.