KHAWTHLIR

Thisen pe

June 17, Inrinni khan KṬP, Chhinga Veng East Branch chuan an kohhran hall-ah Synod Hospital tan thisen unit 34 an pe a, petute mipa 30 leh hmeichhia pali an ni. ṬKP, Lawngtlai Salem Unit pawhin Lawngtlai District Hospital tan thisen unit 11 an pe a, petute mipa 10 leh hmeichhia pakhat an ni.

Minister-in tlawh

Minister Lalrinawma chuan June 17, Inrinni khan a bial Tuikum constituency chhunga Thentlang leh Sialhau khua a tlawh a, khawtlang hruaitute nen khawtlang mamawhte an sawiho. Lalrinawma chuan, khawtlang hmasawnna tur ruahmannate khawtlang hruaitute leh department hotute'n an sawiho hmasak a ṭha tih sawiin, "Mipui pawhin ngaihtuahna kan sèn a, khawtlang tana ṭha leh mi tin chhawr theih thilte i dap ṭhin ang u," a ti.

Mobile awareness

Mamit SP Office leh MHIP Sub-Headquarters chuan June 17, Inrinni khan Mamit khawpuiah zûk leh hmuam do leh vaihlo (gutkha) aṭanga thil siam zuar lo tura inzirtirna, Mobile Awareness Campaign an buatsaih. Dawrkaite chu mihring ei tura siam leh buatsaihah vaihlo leh a kaihhnawih telh chu dan khap a nih dan an hrilhfiah a, zuar luite chu dan hmanga hrem theih an nih thu an hrilh a ni.

Officer kai sang

Mizoram Police Service officer C Lalzahngoa chu Grade-B aṭangin Grade-A ah a kai sang a, Mizoram sorkarah secretary a ni dawn a, Fisheries department a enkawl ang.

Bairabi enfiah

UDPA director H Lianzela leh a thawhpuite chuan June 17, Inrinni zing khan Bairabi-a bawlhhlawh paihna (dumping ground) an enfiah a, siamṭhat dan tur an ruahman. Bairabi Joint VC-te'n rel chawlhhmuna vantlang inthiarna tur an sak mek leh rel chawlhhmunte an enfiah bawk.