Kuhva chíngtute'n dan loa phurh kuhva rah tam tham tak an man

Hachhek Bial Kuhva Chingtu Pawl (HBKCP) member-te chuan June 18, Pathianni zing khan truck pahnih aṭangin dan loa phurh kuhva rah an man a, kuhva rah phurtu truck viltu an man tel nghal. Kuhva rah hi quintal 144 vel nia chhût a ni.

HBKCP member-te'n kuhva rah an mannate chu - Laldanmawia s/o Lalrozuala, Tuikual South nia inchhál khalh truck MZ-01 U-9525 leh Vanlalnghaka s/o Lalmalsawma, Bawngkawn Hmarveng nia inchhál khalh truck MZ-05 4017 a ni a; truck viltu an man tel chu WagonR car MZ-01 K-4332 khalhtu Lalmuanawma, Luimawi a ni.

Laldanmawia hian kuhva a phurh chu Champhai lam aṭanga lak, Rangvamuala Truck Terminal-a dah tur a ni a, driver-in motor a khalh chhunzawm theih tâk loh avangin inhlawhin a khalh zui ta niin HBKCP hruaitute a hrilh.

HBKCP tarlan danin, kuhva phurtu truck-te viltu Lalmuanawma chu hman ní lawka BSF-in kuhva an mansak tawh leh kudam neitu a ni a, truck pakhat zawka phurh chu a kudama dah tur a ni.

Kuhva ro mante leh a phurtu lirthei chungchang ngun taka an sawiho hnuah HBKCP chuan police kutah an hlân a, Champhai lam aṭanga phurh a nih avangin Customs department-ah police-in an hlan chhâwng leh a ni.