Lui hrang hrang tihfîm theih lohin a nú; Tlawng nut chhan chhui phalna dil dawn

Mizorama lui ṭhenkhat chu mipui ei/in atana tihfim theih loh khawpin a nu mek. Centre for Environment and Social Justice (CESJ) chuan, Tlawng lui tui nut chhan leh tibawlhhlawhtute chhui chhuah a, dan anga hmalak a nih theih nan Aizawl district Chief Judicial Magistrate (CJM) hnenah chhui phalna an dil dawn tih an tarlang.

Public Health Engineering (PHE) department chuan, "Aizawl khawpui tui tlan Tlawng lui a nut nasat avangin tui pump a khaihlak nasa a, eng chen nge tui hi a la nut dawn hriat a ni lo. Mipuite tui renchem taka hmang tur leh ruahtui khâwl lama ṭan la hrâm hrâm turin kan inngen e," tiin tun hnai khan hriattir an lo tichhuak tawh a ni.

Saitual khawpui leh a chhehvel chawmtu tui lâkna, Tuivawl lui pawh leivûng paih vangin nasa takin a nu a, hei vang hian May 19, 2023 aṭang khan tui pump theih a ni lo a, thla khat vel tui pump theih a nih tawh loh avangin mipuiin tuiah harsatna an tâwk nasa hle. Tuivawl lui tui hi a nut dan tehna, Nephelometric Turbidity Unit (NTU)-ah 400 vel a ni mek.

Champhai khawpui châwmtu Khawchhak Tuipui pawh a nu hle a, June 14, 2023 aṭang khan pump chhuah tlak loh khawpin a nú a, PHE-in tui an pump leh theih hun tur hriat theih a ni rih lo nia sawi a ni. Kumin hi Tuipui lui tui a nut ber kum a nih thu leh a nut lam chu a tehnaah NTU 514 a kai niin an sawi.

Mihring ei leh ina him chin chu NTU 5 a ni a, tihfìm tura treatment plant-a lak luh theh chin chu NTU 10 vel a ni. Tuivawl leh Khawchhak Tuipui lui tuite hi tihfìm theih chin aia a lêt tam takin a nû a ni.

CESJ chuan, Tlawng lui nut chhan chu Mizoram sorkar hmalaknaa link road laihnaah dan loa leivûng paih vang te, hna hrang hrang thawhna leivûng leh bawlhhlawh paih vang te, in sakna hnawmhnawk leh mimal leh dawrkai bawlhhlawh a rûka Tlawng fintu lui kawra paih vangte a nih thu an tarlang a, "Dan loa leivûng leh bawlhhlawh paih chu ruah a sûrin Tlawng luiah a lut khawm vek a ni," an ti.

Tlawng lui nut vanga tui a pump theih loh avangin fûrah pawh Aizawl chu tui ṭàmin a ṭám mek nia sawiin CESJ chuan, "Mizoram luite hi fur ruahsur vangin in tlak loh khawpin a nu ngai lo," an ti a; Mizorama lui ṭhenkhat nut zawng June 16, 2023-a an tehna aṭang pawhin National Highway & Infrastructure Development Corporation Limited (NHIDCL) kawng laihin a khawih phak loh luite a nu nasa ve lo tih a chian thu an sawi.

CESJ chuan, Mizorama lui hrang hrang, mihring leh thlai, ran leh ramsa, luia nungchate tana ei tlak loh khawpa lui tui a nut chhan chu national highway kawng siamtu NHIDCL leh an hnuaia contractor-te'n lei an laihna vûng, dan loa kawng thlanga an nawr liam ṭhin vang niin an tarlang.