Rualbanlo quota-a sorkar hna hmu Mizoramah mi 100 vel an awm

Health & Family Welfare minister Dr R Lalthang­liana chuan nimin khan Hospital & Medical Education auditorium-ah 'Workshop on Assessment and Certification of PwD's as per RPwD Act, 2016 (for specialists and supporting staff)' a hawng. Mizoram sorkar hnuaiah rualbanlo quota-a hna hmu mi 100 vel an awm tawh tih tarlan a ni.

Workshop hi persons with disabilities (PwD) commissioner Vanlaldiki Sailo-in a kaihruai a, Mizoram sorkar hnuaia medical officer 40 vel leh thawktu dangte an tel. NIEPMD, Chennai aiawhte leh project director Dr PC Lalramliana ten thu an sawi a ni.

Zirhonaa tarlan danin, Rights of Persons with Disabilities (RPwD) Act, 2016 hnuaiah rualban lohna chi hrang 21 chhinchhiah a ni a, Mizoramah rualbanlo mi 16,000 vel chhinchhiah a ni tawh.

Dr R Lalthangliana chuan, rualbanlote enkawlna lama doctor thiam bik mamawhna a nasa tih sorkarin a hriat thu a sawi a, "Tun dinhmunah lâk belh thei rih lo mah ila, doctor kan neih sate aṭangin tih dan ngaihtuah a ni ang," a ti.

Rualbanlote chung­chang inzirtirna uar a ngaih thu sawiin Minister chuan, "A bik takin thingtlang lamahte disability certificate nei lo an tam em em a, sorkar hnena bengdár vuah tur dil dawn leh thil dang dangah disability certificate tel lo chuan tih theih a ni si lo a, disability survey neih pawh a ṭul hle," a ti a; chutihrualin, disability certificate pek chhuah danah fimkhur a ngaih thu a sawi.