Kumina fûr ruahsur kaihhnawihah hmun 24-ah chhiatna a thleng tawh

Tun hnaia ruahsûr nasa avangin Mizoram hmun hrang hrangah chhiatna a thleng. Di­sas­ter Management & Re­ha­bilitation (DMR) department-in nimin chawhma dar 11 thlenga district pali aṭanga report a dawn chinah, hmun 24-ah leimin, lung tla, lungrem chim leh kângmei vangin chhiatna a thleng a, thi leh hliam an awm lo.

DMR department aṭanga Vanglaini thu dawn danin, district pali aṭanga report an dawn chinah tun hnaia ruahsûr nasa avangin Mizoram hmun 23-ah chhiatna hrang hrang a thleng a, in pakhat a kâng. District dangte pawhin report an buai-pui mek a, DMR-ah an la thehlut rih lo thung.

DMR department-in report an dawn chinah, Aizawl district-a hmun pathumah leimin a awm a, hmun pathumah lung tla leh hmun pakhatah in kâng a awm. Heng chhiatna thleng vang hian in chhia pathum, kawng ping/chhia pathum leh lirthei chhia panga awm a ni.

Champhai district-a hmun 14-ah leimin vangin chhiatna a thleng a, District Disaster Management Authority (DDMA) kaltlangin tarpauline 28 pek chhuah a ni.

Serchhip district-ah hmun pahnihah leimin a awm a, DDMA-in tarpauline pahnih a pe chhuak. Baktawnga leiminin national highway a hnawh chu NH enkawltu NHIDCL-in an thian fai. Mamit district-ah lung tla vangin chenna in pakhat a chhe bawk.

Hetih lai hian, June 18, 2023 khan Meghalaya state-a Sonapur-ah leiminin NH-10 kawngpui a hnawh avangin lirthei eng emaw zat a táng a ni.