MYC coaching-a zir zinga mi 141-in sorkar hna an hmu tawh - MYC Chairman

MNF adviser Dr Vanlalṭanpuia, Mizoram Youth Commission chairman ni bawk chuan nimin khan Mizo Hnam Rûna inkhawmah thu sawiin, kum 2018-2022 chhungin MYC coaching-a zir zingah mi 141-in sorkar hna an hmuh tawh thu a sawi.

Dr Vanlalṭanpuia chuan, MYC-in ṭhalaite tana hna a thawh leh hma a laknate'n rah ṭha a chhuah mek nia sawiin, "Vawi leh khata rah chhuak hmuh nghal theih chi a ni lo. MYC chu beidawng loin ṭhalaite tan a pên zel a, nakin lawkah rah chhuah ṭha kan hmu ngei ang," a ti a; nu leh pate chu an fate tan rosum tiral phala buaipui turin a ngen.

MYC Chairman chuan, June 12, 2023-a Central Services Examinations 2023 preliminary exam result chhuakah Mizoram aṭangin mi panga an tlin thu a sawi a; MYC-in coaching a kalpuia kum 2018-2022 inkara lutte zingah mi 141-in sorkar hna an hmuh tawh thu te, bank-a thawk mi 38 leh private firm-a thawk mi 42 an awm tawh thu te, MYC coaching kaltlanga sipaia lut mi 70 chuang an awm tawh thute a tarlang.

Vanlalṭanpuia chuan, sap rama hna thawk turte'n an paltlang ngei ngai Occupational English Test chu MYC-in an kalpui tih sawiin, "Nurse mi pakua chu OET paltlangin sap ramah hna thawk turin MYC chuan a tír thla tawh," a ti.

MYC Chairman chuan, Counter Insurgency and Jungle Warfare School, Vairengte chu MYC-in thuthlung a ziahpui a, sipai laknaah an thawhho dawn thu te, MYC-in hybrid coaching an kalpuiah online leh offline-in mi 100 an awm mek thu te, MNF sorkarin nasa takin MYC a tihchangtlun thute a sawi bawk.

Dr Vanlalṭanpuia chuan, India rama national party paruk zingah MNF aia upa pakhat chiah a awm thu sawiin, "Hei hian MNF ropuizia a tilang. MNF politics innghahna hi a dik a, Pathianin mal a sawm tlat. Mizorama party duah chho mek awm chhun chu MNF hi a ni," a ti.