MPCC-in Mizoram leh Manipur CM-te inbiak dan Mizoram tan him lo an ti

Mizoram Pradesh Congress Committee (MPCC) chuan, June 18, 2023-a Manipur chief minister N Biren Singh-a'n a rawn biaknaah a ngenna ang ang Mizoram chief minister Zoramthanga'n a lo pawmpui duak duak nia sawiin, Mizoram tan a him loa an ngaih thu an tarlang.

MPCC thuchhuah chuan, May 3, 2023 aṭanga Meitei hoin Manipur-a Zo hnahthlakte chunga buaina nasa tak an siam tirh lamah Manipur CM N Biren Singh-a'n CM Zoramthanga a be duh lo a, a phone call pawh a chháng duh lo niin an tarlang a ni.

Meitei-te rapthlak tak leh râwvâ taka Zo hnahthlakte chunga an chêt hnua phone call hmang maia inbiakna kalpui a ni chu ṭha lo an tih thu sawiin MPCC chuan, "Manipur CM ngenna ang ang lo pawmpui duak duak hi Mizoram tan him loah kan ngai. CM Pu Zoramthanga hi Mizoram leh Mizo hnam zahawmna humhim tura Manipur CM Biren Singh-a bâwl kual vel mai maia awm lo turin kan ngen a ni," an ti.

MPCC chuan, pawnláwi taka state pahnih chief minister-te an inbiak mek laia All Assam Manipuri Youths Association-in MNF party an vau ngam chungchangah a phènah Manipur CM a awm an rin thu an tarlang a, "AAMYA-in June 23 aṭanga Assam leh Mizoram inkalpawhna kawng tiamchin awm loa danchah an tum Hmar Students’ Association, Assam Hills leh North Cachar Hills Indigenous Students’ Forum-te hmalakna vanga ṭhulh a ni hi lawmawm kan ti tak zet," tiin, HSA leh NCHISF hmalakna chhuanawm an tih thu an tarlang.

Congress party chuan, tunlaia BJP sorkar chet dan chu sakhaw dang vuantute leh hnam tênau zawkte chîm ral tumna a ni tih a chian thu sawiin, "Hei hian India democracy lungphûm a sâwi nghîng mek," an ti a; Mizo ram, hnam leh sakhua chîm ral tumtu leh nék chêptu BJP nasa zawka do turin Mizorama tlawmngai pawl te, political party-te leh kohhrante an ngen a ni.

Mizoram Pradesh Youth Congress Committee pawhin thu­chhuah siamin, CM Zoramthanga'n Manipur CM Biren Singh nena an inbiak thu a tarlanah, Manipur-a Mizote himna lam a sawi ri lo chu a zahthlak an ti a, pawi an tih thu an tarlang. "Zo hnahthlakte laka Meitei chetna dik lo tak puanzar a ni chho zel a, hetih laia kan CM thu leh hla tlanchhe aw tak mai hian mangangte a thlamuan lo a ni," an ti.