BJP beih rawnpuiah PC party President-in party dangte a sâwm

Peoples Conference party president Vanlalruata chuan, inthlanpui awm leh turah BJP an tlin loh nan politcal party hrang hrang an thawhho a ṭul thu a sawi.

Vanlalruata hian nimin khan PC party office bearer meeting-ah thu sawiin, 'Kan ram, kan hnam leh kan sakhua a him tur a ni' tih chu an party innghahna a nih thu a sawi a, "Kan ram, hnam leh sakhua innghahna lungphûm sâwi ṭhiah tumna eng pawh kan do zel dawn. Tuna BJP chêt dan hrang hrang en hian, kan party innghahna lungphûm ṭhiah tumna nia kan ngaih avangin dodal ṭul kan ti a, kan party chakna mai a tâwk loh avangin kan ram, hnam leh sakhaw humhim nan party hrang hrang kan ṭan rual a ṭul," a ti.

PC President chuan, "India hmar­chhak state zingah Mizoram hi lotus la par chhuah hleih theih lohna awm chhun a tih theih a, kan vannei hle. Hei vang hian BJP chuan chawr chhuah tumin hmasawnna hmathehin chak takin an bei mek a ni," a ti a; kum 30 chuang kal taa Ṭhenphunga'n Mizoram hmasawnna tura hmathlir a neih tawhte chu tun thlenga Mizoram mamawh bul leh hmasawnna tluantling neihna tur a nih thu a sawi.