PM-in loneitu vbc 8.5 chuang bank account-ah pawisa a thunsak

Prime minister Narendra Modi chuan nimin khan Pradhan Mantri Kisan Samman Nidhi Yojna (PM-KISAN) scheme kaltlangin cheng vaibelchhe 17,100 chu loneitu vbc 8.5 chuangte bank acoount-ah a thunsak. 

PM-KISAN hi kum 2018 De­cember 1 khan hman ṭan theih tura hawn a ni. He scheme hi central sector scheme a ni a, sorkar laipui chuan he scheme-a fund (pawisa) hi 100% a tum. Kum khat chhunga loneitute hnena ṭanpuina, Rs 6,000 pekna tura duan a ni a, sorkar laipui chuan he scheme atan hian cheng vbc 90,000 a ruahman. 

Pawisa hi loneitu Aadhaar card hmanga bank account siamte hnena thunsak a ni a, December 2018 leh November 2019 inkar khan he scheme-ah hian loneitu vbc 9 chuang an inziak lut a, an zinga vbc 7.62 (84%) chuan he scheme-a  installment hmasa ber chu an dawng tawh a ni.   

Loneitute tana hamṭhatna tur, Agriculture Infrastructure Fund atana cheng vaibelchhe nuai khat dah chu nimin khan Modi chuan a hawng bawk. Agriculture Infrastructure Fund hi Central Sector Scheme hnuaia mi tho a ni. He fund hi buh seng hun hmaa cold storage siam nan te, collection centre siamna te leh processing unit bakah loneitute mamawh tur thil dang dang atana hman tura duan a ni. 

Agriculture Infrastructure Fund-a sanction hmasa ber kaltlangin lonei­tu 2,280-te hamṭhatna tur cheng vaibelchhe 1,000 chu nimin khan PM chuan a hawng nghal bawk.