Mizoram panna kawngpui dan tumtu AAMYA hruaitute police-in an man
All Assam Manipuri Youths' Association (AAMYA) chuan June 18, Pathianni khan thuchhuah siamin, Manipur-a Zo hnahthlakte tana rorelna hran neih an phûtna Mizorama rorel lai MNF party-in an thlâwp sût a nih loh chuan June 23, 2023 aṭangin Mizoram panna kawngpui Assam-ah dan an tum thu an puang a; police-in an man hnuah June 18 zan khan an sût leh nghal.
June 18-a thuchhuah an siamah AAMYA chuan Cachar aṭanga Mizoram panna kawngpui dan chah a, tiam chin awm loa economic blockade kalpui an tum thu an tarlang a ni. June 18 vek khan thuchhuah siam leh nghalin, economic blockade kalpui an tum chu an sût thu an tarlang a; an sût chhan an tarlan chu - Assam-a Manipuri challang tak takte'n ti lo tura an ngen vang a nih thu an tarlang.
Hetih lai hian, Mizoram police hotute hnen aṭanga thu dawn danin, AAMYA hoin Mizoram panna kawngpui dan an tum thu an puan hnuah AAMYA hruaitute chu Assam Police-in June 18 zan khan an man a, chumi hnuah kawngpui dan an tumna chu sûtin, an sûtna lehkha pawh Assam Police hnenah an pe nghal a ni.