Min fiah turin Mizo mipui kan cho - MLA Zaithanzama

ZPM party chuan nimin khan an pisaah inkhawm an nei a, MLA VL Zaithanzama'n thu sawiin, kum 35 chuang Mizoram hruai tawhtu Congress leh MNF party-te chu eng mah thawk loah an puh lo a, an thawh chin erawh a lungawithlak loh thu leh Mizo mipuite'n ZPM fiah an cho thu a sawi.

MLA VL Zaithanzama chuan, MNF leh Congress party-te'n kum 35 chuang Mizoram an enkawl tawh tih sawiin, "An thlen chin kan hmu. Eng mah thawk loah kan puh hauh lo a, mahse, an thawh chin erawh a lungawithlak loh. ZPM hian ram kan siamṭha thei kan ti a, min fiah turin Mizo mipui kan cho a, min enchhin rawh u kan ti a ni," a ti.

Aizawl West-III bialtu MLA chuan, ZPM sorkarah chuan mi thatchhia leh pamhamte’n hmuhsit an hlawh tial tial dawn a, eiru leh kut tling loa sum late an bitum dawn nia sawiin, "Kan hrawn tawh sorkarte’n sum sema mipuite thatchhiat zirtir a, intodelh kan hlat tial tial ang hi kan ti ve dawn lo a, mipuite taimak kan zirtir dawn," a ti a, mi taima an kâng ang a, hna thawhin awmzia a nei dawn niin a sawi.

Ram hnufual leh hmasawn thei lo ram apiangah eirûk a hluar ṭhin tih sawiin Zaithanzama chuan, "Kan ram pawh kan hmasawn theih loh dan han thlir hian zêp tur a awm lo. Ṭhenkhat chuan ramin sum an siam a, an hausa thûr thûr a, keini chuan kan hmuh chhun chu engzat pawh ni se, dik takin mipui chanvo tur kan siamsak dawn. Sum sawi chhuah tam aiin a hman dan a dik a, mipuiin a zár an zo a pawimawh zawk," a ti.

VL Zaithanzama chuan, ṭhalaite'n state hmasawn dangte ûm phák an châk tih sawiin, "Corruption awm lohna state nih an duh a, danin he ramah hian awmzia nei se an ti a, hah man awma hnathawh an duh. Kan luipuite hman ṭangkai ve an châk tawh a, zirna ṭha neih an duh a, ṭhalaite khawvel thar thlenga din an duh. Heng zawng zawng hi ZPM chuan policy-ah a bilh tel vek a ni," a ti a; mipui mamawh tihlawhtling tura ramin a kohna an chhâng dawn tih a sawi.