KHAWTHLIR

Lehkhabu tlangzarh

Dr Roluahpuia lehkhabu ziah, 'Nationalism in the vernacular: State, tribes and the politics of peace in Northeast India' tih chu nimin khan MJA president C Lalrambuatsaiha'n Aijal Club-ah a tlangzarh.

Lungin in delh chhia

Nimin zing dar 2:30 vel khan Rokhawmthangi (L) in, Mamit Hmarvenga mi, a fate'n an luah lai chu an kawmchhak aṭanga lung lumin a delh chhia. Mamit aṭanga thu dawn danin, zan lamah kawmchhak aṭanga lei tla a awm avangin ina chengte chu an riak chhuak a, thi leh hliam an awm lo. In chima bungrua leh hmanruate chu nimin khan Mamit Hmarveng khawtlangin an senghawi a ni.

Mamitah thukhawm

Mamit District Task Force on Ruihhlo Do chu nimin khan Excise & Narcotics minister Lalrinawma hoin DC conference hall-ah an ṭhukhawm. Mamit district-ah detox centre / rehabilitation centre a awm lo chu ngaimawhawm an tih thu leh a awm theihna atan hmalak dan tur an sawiho a ni.

EVM endik

MLA General Election 2023 atana inpuahchahna kal zelah nimin khan Khawzawlah electronic voting machine (EVM) khawl 36 leh voter verifiable paper audit trail (VVPAT) khawl pakua endik a ni. VVPAT leh EVM endiknaah hian inthlan kaihhnawih thawktute leh political party aiawhte an tel.

Prelims-a tlingte thingpui inpui

Mizoram Youth Commission chairman Dr Vanlalṭanpuia, MLA chuan nimin khan MYC conference hall-ah UPSC Civil Service Examination 2023 preliminary-a Aizawl centre aṭanga inziak tlingte thingpui a inpui. MYC Chairman chuan, Mizoram sorkarin ṭhalaite a ngaihsak tih sawiin, "Sum neih tam vang ni loin, ṭhalaite hmakhua ngaih vangin zirna lama puih ngaite tan a inhawng reng," a ti. CSE 2023 prelims-ah Aizawl centre aṭangin Mizo 10 leh hnam dang pahnih an inziak tling a ni.