Sorkar kar nan CSS hnuaia thawkte'n badge dum an bel

Centrally sponsored scheme (CSS) hnuaia Mizorama thawkte chuan Study Group on CSS rawtna (recommendation) tihlawhtling tura Mizoram sorkar kar nan leh lungawi lohna lantir nan nimin aṭang khan hna an thawhnaah badge dum an bel ṭan.

Hnathawhnaa badge dum bel hi Mizorama CSS hnuaia thawkte intêl khawmna, All Mizoram CSS Employee Coordination Committee (AMCECC)-in an rèl anga kalpui a ni a, ruahman lâwk ang chuan, vawiin leh naktukah pawh badge an bel leh ang. Badge dum an bel chhungin sorkar aṭanga thu lawmawm an dawn loh chuan June 22, 2023 (Ningani) hian an kal zel dan tur an rel dawn a ni.

Hna thawhnaa badge dum bel hi CSS hnuaia thawkte'n an zawm ṭha hle a, district tina sorkar department hrang hrang office-a CSS hnuaia thawkte'n badge dum an bel vek tih sawiin AMCECC chuan, "CSS hnuaia thawkte'n kan zâwm ṭha tak zet a ni," an ti.

Study Group-in Mizorama CSS hnuaia thawkte hamṭhatna tur hrang hrang a rawt a; chu'ng zingah chuan seniority anga a tahtawla dah ngheh (regularised/absorbtion) te, recruitment rules siam te, medi­cal reimburse­ment an neih theih dan tur siamsak te, transfer TA/DA siamsakte a tel tih AMCECC chuan an tarlang.

AMCECC chuan, sorkar laipui aṭanga CSS sum rawn kalte a hun takah a hmangtu tur nodal agency hnenah pek chhuah a ni lo ṭhin tih tarlangin, "A hun taka pek chhuah ṭhin a nih loh avangin hmasawnna hnathawhna tur sum leh hlawh a hun takah CSS employee-te'n kan la thei lo ṭhin hi Central guidelines angin ni 21 hma ngeiin a dawng tur nodal agency-ah pek chhuah ṭhin ngei kan phût tlat a ni," an ti.

AMCECC hian hmalakna tura an rêlte a hlawhtlin theih nan Mizorama CSS hnuaia thawk zawng zawngte chu AMCECC rorel leh hmalakna ngaichâng zel turin an ngen a ni.